"

Truukblik

Column: Dan sjrief mer plat

 

’t Einde van ’t jaor is in zich en dan kieke väöl luuj truuk op ’t aafgeloupe jaor. Ich wil waal truukkieke nao al die sjtökskes wat ich pis noe höb gesjreve in de Hulsberger.

Es ièsjte kaom ich veurig jaor binne mèt dat sjtök euver de Limburgse taal. Wie sjrief se Limburgs en wenniè kómme d’r waal of gein teikes op de klinkers en wie sjprèk se dat oet. Daonaeve haet ’t Limburgs väol geveulsweurd, wao d’r gein ech Nederlandse synoniem veur is. ’n Veurbeeld hiejvan zint de Limburgse weurd die veer gebroeke veur ’t woord “sukkel”. Daobiej haet ’t Limburgs ouch nog väöl vergaete weurd en oetdrökkinge, die amper nog gebroek waere. Dit kump ouch truuk in ‘t “Gebroeks-Huilands”. En daonaeve zint veer ouch good in ’t Duutsj kalle.

Rónd de Carnaval höb ich ’t gehad euver ’t viere van carnaval van vreuger en van noe, de proklematie van Naud en Kirsten gans euverhoup gegoajd en höb de name van de carnavalsgroepe ins ónger de loep genómme. Ouch de vastetied en de paosjhaas is langsgekómme, sjuus zoa wie de kómkómmertied en ’t waer mèt de waerheilige.

In september kaom ’t nuuts dat d’r ‘n Limburgs toetsebord veur de mobiel op de mert zou kómme. Jaomer genóg is dat nog ummer neet geïntroduceerd, meh veer weite noe waal wat al die knuup in ’t Limburgs beteikene.

Al mèt al zeen ich ummer miè Limburgs gesjrif langskómme. En wat mich hièl good deit is dat d’r ouch dèkser gesjreve wurt nao de offesjele Limburgse sjpelling. En mèt dit positief berich sjleet ich 2017 gaer aaf en wunsj uch hièl sjoane fièsdaag en ‘ne goje roetsj!

 

Laes editie 2-22 van #de Hulsberger