"

't Waer en de Heilige

Column: Dan sjrief mer plat

 

“Wat ‘n waer vandaag, hè?” Dit is zoa’n tiepise vraog um mèt emes ’n gesjprek te wille veure en äöveriges ’t meist gekalde óngerwerp in ós dageliks laeve.

Neet gek eigelik, umtot ’t waer groate impek haet op ós fungsjenere. Pak dich mer ins ’t verkièr, ós vakansies of esse ’n leuk oetsjtepke wils make. Um te weite welk waer ’t wurdt, kieke v’r hujerdaags nao bv. “Buienradar” um de waersveursjpellinge tot waal 14 daag veuroet te weite. Meh vreuger waore d’r gein sateliete die dit noe veur ós reigele. Toen keek me nao de wolke, de wind en neet ónbelangriek wie de dere zich gedroge. Hiejdoor zint toen waersjpreuke óntsjtange, wat veur toen geliek waor es ózze Buienradar en die noe nog dèks langskómme.

‘n Waersjpreuk van bv. d’n 11e van d’n 11e (St. Maarten, St. Martin(us), St. Martijn) haet betrèkking op ’t waer van kómmende winter: “Is ‘t duuster op St. Martin, dan zal de winter zach zin, mer is St. Martin helder, kump de voosj in de kelder”.

Op 22 november (St. Caecilia) is de patroansdaag veur ’t Gemengd Koar en de fanfaar van Hulsberg: “De daag aan St. Cecilia gewied, is de maotsjtaaf veur de wintertied”.
En op 23 november (St. Clemens) is ‘t de patroansdaag van de fanfaar van Genhout: “Wintert ’t op St. Clemens hel, wurt de lente klaor en fel”.

Of ’t oetkump? Gein idee, meh dizze lètste waersjpreuk is zoa klaor wie e zunneke: “Es ’t raegent dan is ’t naat, en es ’t vruus dan is ’t glaad”.

 

Laes editie 2-21 van #de Hulsberger