"

Hulsberger aan 't woord

Helga Keulen

 

Thei, bedank veur de nominatie um mich ’t woord te gaeve, gans vanoet Frankriek. Ouch al vul ich ekere maond de column mèt “Dan sjrief mer plat”, wil ich bès waal get euver michzelf vertèlle.

Ich bèn Helga Keulen, gebaore en getaoge in Hölsberg. In 1961 kaom ich es driede kind kieke in de sjlechterie van Jacques en Tiny. Jack en Marjo waore mich al veurgegange en nao mich kaome nog Mariëlle en Gunther. Al jónk moos ich mèthelpe in de sjlechterie en es dat wèrk vaerdig waor, moch ich boete gaon sjpele.

Tot mien 16e jaor höb ich allein op maedsjessjoale gezaete; de liègere sjoal in Hölsberg en daona 3 jaor intern in Maaseik, allebeij ónger ‘t sjtreng rezjiem van nónne. Wie ich es gans verlaege maedje (toen waal nog) nao ’t Coriovallum College in Haelder ging keek ich mien ouge oet, want toen kaom ich d’r achter dat d’r ouch nog ’n anger gesjlach op de weld besjtóng.

In de tied dat ich op sjtap moch gaon, ging ich wie ekerein nao “de Bok” en noa “La Baraque”, wo ich Ronald Verlaan höb lière kènne. Es Heëlenaer haet hae mich laote kènnismake mèt de Hölsbergse KWJ en de vrundsjappe die veer doa höbbe gesjlaote besjtónd nog ummer, wat nao 36 jaor waal hièl biezónder is.

Ronald en ich zint in 1984 getrouwd en verhoesd noa Bliejerhei wo Loes en Roel zint gebaore. Nao 6 “lange” jaore kaome veer truuk heim en höbbe ein van de väöle hoezer van Fien van Sjièpesj gególle. Rónd dae tied sjpeelde veer ouch mèt biej “De Ruuttuuters” (= Ruud haet ós lière tuute). Hiej höbbe v’r allenèj ‘ne sjieke tied gehad, zoawaal mèt carnaval es dao boete zoa wie Keuniginnedaag in Amsterdam, optraejes veur ’t management van Vodafone en neet te vergaete de beroemde äöpeninge van de carnaval mèt alle Hölsbergse zaate hermeniekes.

Umtot ich ’t blaoze hendig sjiek vóng, bèn ich trómpètlès gaon numme en biej de fanfaar van Hölsberg gegange. Hiej zoot ich es “ouw” naeve Jos Lemans, toen nog ‘n jónk breukske. Wat höbbe veer vöäl sjpass en gelache ónger de rippetiesje, wodoor de dirigent dèks zag: Duuj dich ’n bruèdsje in de mónd. In 2009 bèn ich gesjtop mèt meziek make en sinds dae tied bèn ich besjtuurslid/vice-veurzitter wo ich veural de pr, ledelies, concertreize en de website verzörg.

Ein van de sjiekste gebeurtenis in ós laeve is toch waal Prinsepaar van ’t Beumerwald 2015 te zin. Óndanks mien groate twiefel of veer hiejveur neet te oud waore, höbbe v’r gein minuut sjpiet gehad van dees besjlissing! Van dit enthousiasme haet de vereiniging dan ouch good gebroek gemaak um mich te sjartere veur ’t boewe en óngerhoute van hun website.

Tot eind 2012 höb ich biej de Open Universiteit Heerlen gewèrk es ICT’er en Designer, pis tot de aafdeiling opgedook woort. Dit is ’n raej gewaes um wir in de sjoalbanke te kroepe en de opleiding Grafisch Vormgeving te volge en de Pedagogisch Didactische Aantekening te haole.

Óngertösje höb ich al bienao 4 jaor mien eige Grafisch Design Buro: Shift8. Naeve ’t grafisch design (website, hoessjtiel, reclame, social media, enz.), gaef ich ouch les in webdesign op MBO en typevaardigheid op basissjoale en sjrief mien eige lesprogramma’s: webdesign en Facebook voor Beginners. Veur dat lètste sjteit trouwes de ièsjte cursus in ’t naojaor op de plenning in ’t Gemeinsjapshoes. Hiej kump binnekort miè info euver.
En mèt good waer kènt ’t zoa mer zin dasse Ronald en mich hiej of dao in ós sjoane Limburgsland langs zuus kómme op ózze scooters.

Thei, nogins bedank en ich wil Germy Vliegen gaer 't woord gaeve veur de volgende editie, umtot ich weit dat Germy uch genóg te vertèlle haet.

 

Laes hiej 't sjtök op de website van #de Hulsberger

Laes editie 2-16 van #de Hulsberger